Etiquetas

domingo, 16 de diciembre de 2012

Us cabalus

Us cabalus, sortus pur u bosqui,
me train recordus...
recordus, de cuandu u homi era libri.
(Fala de Xálima)


lunes, 10 de diciembre de 2012

Latíus

Veu el latíu de la Mairi Tierra,
tamién, ena suponía decrepitú ‘el hivielnu…
enos cuerpus esnúus de los árbulis
asperandu primavera.
Veu el latíu ‘el Universu,
enos lubricanus ‘el Sol
que desparcin sangri
sobri el horizonti.
Veu los mis propius latíus
enos mis ojus satisfacíus…
enos mis pasus.





domingo, 2 de diciembre de 2012

Vientu

 El vientu gélidu ‘el ivielnu
susurra cálidamenti al pelleju
al abrigu d’un planeta qu’agila,
inesorablimenti,
pa ofrecel el refrescanti susurru
de cualisquiá día abrasaol ‘el veranu… 



sábado, 1 de diciembre de 2012

Paseu po-lo bosqui

Agilu en metá la hermadá 'l bosqui
sintiendu con los mis piesis
el tactu cálidu de las vestiúras de los árbulis
jundeás p'al suelu.
Y los mesmus copinus de nievi
qu'acarician a los sus cuerpus esnúus...
acarician a la mi cara.

photo by antòniu


sábado, 10 de noviembre de 2012

Navegandu

Navegandu 
el Universu enteru
en una gotina de lluvia...

photo by antòniu

sábado, 3 de noviembre de 2012

Latiendu con corazón d'alas



Volandu con alas 
de corazón...
latiendu con corazón
d’alas.

painting by antòniu

Güenas nochis, blog


Retomu el mi blog dispuesinu d’una tupa mesis múu.
¿Pol qué?... nu sé bien, quiciás puru tiraeru creativu. Quiciás sea esta toñá lluviosa qu’ invai toínu ya de desbordanti coloríu y prevoca. Quiciás es, velaili, él en retomándumi.
Al fin y al cabu... Es lu mesmu,
 Nu pretendu na, nu asperu aprebación de naidi... tan solu abril nuevas páginas. Si cabi atesorar ecu de corazón n’el mi cuadernu… humildimenti esti blog.  



photu by antòniu