domingo, 29 de mayo de 2016
La primavera agila
La primavera, es una dama callaína qu'agila lentu con piesis
escalzus po- la montaña. Asciendi jasta
alcontralsi con'el hivielnu enos picus más altos, en tovía con nievi. Y al su
pasu, va ejandu un mar amarillu de piolnus qu'avanza con'el su oleaji
ascendenti... día a día... ola a ola. Ambaju,
enos vallis, los pétalus van dandu pasu a las semientes comu preludiu de la llegá
'el veranu. Y esti veranu, haberá d'agilal tamién sigilosamenti con los sus
piesis esnúus, deseosu del mesmu mou, d' alcanzal el venerabri templu del hivielnu
cuasi irreductibri de las cumbris.
photo by antòniu
martes, 24 de mayo de 2016
Enciclopedias
La enciclopedia de los saberis humanus, palra d'una tupa
conocencia peru de poquina concencia. La
enciclopedia de los saberis humanus, palra d'imposición, prepotencia y cuasi
nenguna consideración pa la biodiversidá. La enciclopedia de las prantas ,
palra de sabencia esistencial... en prenu silenciu.
foto by antòniu
martes, 17 de mayo de 2016
La primavera ama
La primavera ama. Ama n'el pariéru de ca hoja, n'el abriéru de ca frol, n'el latíu de ca pájaru libri.
La primavera sonriyi, ofreci el su sonriyil más amabri en los sus labius
múus.
La primavera enseña, enseña sabencia esistencial en ca
página 'el su libru. En ca palabru, en ca letra... en la muestra página tamién.
photo by antòniu
Suscribirse a:
Entradas (Atom)