Etiquetas

lunes, 27 de marzo de 2017

lunes, 13 de marzo de 2017

Dil en cata

¿Dil en cata un nombri pa'l corazón,
si solu paeci habel pelleju?
Latil Sol,
acaricial la voci propia 'el pechu.



viernes, 10 de marzo de 2017

Agua

 De nuevu renti l'agua. Siempri l'agua, apaciguandu la sedi de los bezus, refrescandu al pechu qu'agila... El mágicu elementu d'incomprensibri alquimia, que me jadía esvarial ena iscuela: dos átomus d'hidrógenu y unu d'esígenu... airi más airi: a líquidu? una alucinanti combinación qu'ajuyi cuelándusi entri los deus la manu, trasparenti, sin sabol (a iḍil verdá pa mí sabi a groria), sin golol (enqui yo diríe que jiedi bien)... y esu sí, con capacidá de palral y mesmamenti de jaḍel música: música d'estal lluviendu, música d'oleaji de la mar, música de ríu en jervieru, música de chorrera... música sutil de lárima ajocicandu n'el suelu.
Ascuchandu el lenguaji armoniosu de l'agua, la su voci engazapa protagonismu plenu queandu múu al ecu inesezariu de la tontera humana, la de toínus, la de toínas, la mía propia.
Me tumbu ena vera la corrienti, moju el mi jocicu, acoju la caricia de los últimus rayus solaris ena mi jeta y el tiempu se paraliza. Bum-bum, bum-bum, bum-bum, paezu apalpal el tactu de los mis latíus. Veu escuendelsi el Sol tras la montaña. Sali una luna cuasi plena que se refreja ena agua.                                                                                                                                                                                                                                                          















domingo, 5 de marzo de 2017

Reforestandu ena Sierra de Gata


Jaḍi dos añus, n'el veranu 'el añu 2015, jue a acontecel una grandi catástrofi meyuambiental ena linda comarca de Sierra de Gata (norti d'Estremaúra). Unas 8.000 hictárias de bosqui, juorin escachinás pola la lumbri. Esti acontecimientu, tuvu una emportanti repercusión mediática endrentu y juera d'Estremaúra.
Un grupinu de presonas de p'allí, se pusun manus a la obra y están labutandu al tentu la reforestación. A ellas, se las han díu sumandu colaboraóras y colaboraóris de diversus lugaris... mesmamenti  'el estrangeru. El enganduju es faraónicu y es obvia la nesecidá d'intervencionis eficacis pol parti los estamentus públicus.
Esti fin de semana, había una convocatoria pa dil a prantal arbolinus en una zona asocarrá ena jurición de Aḍebu... y velalli mus prantamus, endi La Vera, Alfon, Elba y serviol. El sábau pola tardi, mus arrejundió pa vesital la encantaóra aldeína de Treveju con'el su desageráu castillu a meyu esfarrungal y los sus robreus y castañaris... afortunámenti libris de las llamaretás 'el 2015. Tamíen juimus a Sa Martín de Trevellu ondi puímus conocel  la boéga d'un amigu y oyel palral l'ancestral fala de Xálima.
El domingu, a pesal 'el barruntiju de posibri lluvia u nievi, mus premitió jaḍel el nuestru labutu con apeninas una nébula menúa, qu'esu sí, ejaba el terrenu y los nuestrus piesis remollecíus perdíus. Y velallili estuvimus p'allí unas oras, prantandu robris y alcornoquis con la compaña de Maria, la su jiṣa, Yosuán y Chuchi. To prazel.







































viernes, 3 de marzo de 2017

Nuevamenti en Marruecus

Van pasandu las semanas y entovía nu hei palráu al tentu el mi últimu viaji a Marruecus.
D' hoi nu pasa. Qué iḍil? To un luju, un auténticu privilegiu habel puíu compartil unus diínas con espacius naturalis y humanus únicus e inolviabris: las montañas nevás 'el Atlas, el valli d' Ourika con las sus aldeínas, Ouarzazate, Agdz, el inmensu palmeral 'el Valli 'el Draa, los llanus semidesérticus arrodeáus de montis d'atardecías naranjas , las Kasbash de N'kob, los grabáus rupestris de Tazzarine con imágenis d'animalis de vegetación abondu (jirafas, elefantis, felinus...) de tiempus relativamenti remotus, las dunas, las pistas d'esquí renti Marrakech a tupil de contrastis, los ḍagalinus vendiendu nuecis u ardillas to asustaínas... y sobri to, el gratu recuerdu de presonas amabris, sencillas, auténticas, dinas, respetabris, humanas y de tratu esquisitu la juerza las ocasionis. Tratu que contrasta  con el ramalaḍu xenófoboidi (esestirá el palabru?) jacia toínu lu que representa lu marroquinu, que percebu a menúu al otru láu 'el Estrechu.  Un sutil, u nu tan sutil, ramalaḍu enllenu de tópicus, prejuicius y mesmamenti disprecius. To hai qu' iḍilu! Vaiga el mi agraecimientu.


photo by antòniu









photo by antòniu

  















  





















  









photo by antòniu